Die Sinodale Kommissie het op 26 November 2015 die toekennings van fondse vir 2016-17 vir ringsprojekte gefinaliseer. Klik hier om die projekte en toekennings te besigtig.

Na afloop van die eerste vergadering van die Algemene Sinode se Moderamen (16-18 November 2015) gesels Nelis Janse van Rensburg en Dirkie van der Spuy oor die prioriteite van die NG Kerk en die implikasie van ‘n appèl teen die Algemene Sinode se besluite oor selfdegeslagverhoudings.

Die Moderamen van die Algemene Sinode het die volgende mediaverklaring uitgereik na sy vergadering op 16-18 November 2015. Dit handel onder andere oor appèlle wat ontvang is teen die Algemene Sinode 2015 se besluite oor selfdegeslagverhoudinge:

18 November 2015

Die Moderamen van die Algemene Sinode het van 16-18 November 2015 in Kemptonpark vergader. Die vergadering het in ’n positiewe gees en ’n goeie gesindheid plaasgevind. Daar was hoofsaaklik twee sake op die agenda. Eerstens is onderskeidend gedink oor God se roeping vir die kerk in 2016. Twee prioriteite is geïdentifiseer:

• Die gestuurdheid van gelowiges na die wêreld.
• Die onderlinge verbondenheid van gelowiges aan mekaar.

Die Moderamen het hierdie prioriteite passievol omhels en is oortuig daarvan dat hierdie fokus nuwe hoop sal bring vir ons land en sy mense. Elke sinode en kerklike struktuur sal betrek word by dié hoopgewende beweging. Ons is vas oortuig daarvan dat God, deur die bring en die leef van die evangelie, ’n nuwe toekoms wil ontsluit vir ons land.

Die tweede saak wat ons aandag geverg het, was die besluit van die Algemene Sinode oor selfdegeslagverhoudings. Ons is intens bewus van die diep emosies wat hierdie besluit by gelowiges ontlok het.

Lidmate van die kerk het egter teen die besluit van die Sinode appelleer. Die Moderamen het hieroor advies ingewin by verskeie regsadviseurs. Die gemenereg vereis dat:

• Reeds die kennisgewing van ’n appèl die uitvoering van die besluit opskort. Die besluit is dus nie opgehef nie, maar kan nie tot en met die afhandeling van die appèlprosedure uitgevoer word nie.
• In terme van die kerk se eie ordereëlings kan slegs die volgende gewone Algemene Sinode die appèlle hanteer.
• Die implikasie hiervan is dat hierdie saak, hangende die hantering van die appèlle, nie verder op Algemene Sinodale vlak gedebatteer kan word nie. Dit kan egter op gemeentelike, ring en sinodale vlak verder bespreek en hanteer word.

Die Moderamen doen ’n beroep op gemeentes, ringe en sinodes om veilige en oop ruimtes te skep en verder gesprek te voer oor die aangeleentheid. Die geleentheid moet benut word om deeglik te besin oor die korrekte hantering van die Skrif, studie te doen van vorige besluite van die Algemene Sinode en ander relevante literatuur.

Die Moderamen is besorg oor die effek van hierdie impasse op lidmate met homoseksuele oriëntasie en hulle families en vriende. Ons roep gemeentes, ringe en sinodes op om met deernis en liefde met hierdie persone in gesprek te tree en hulle in te sluit in die warmte van ons kerklike huis.

Die Moderamen is ook besorg oor die lidmate wat met groot weerstand reageer het op die Sinode se besluite. Ons versoek hierdie gelowiges om die kerklike weë te benut om hulle standpunte te stel. Ons glo dat ons altyd almal se deelname aan gesprekke soos hierdie nodig het om uiteindelik die waarheid te onderskei.

Ons het goed nagedink oor die Skrif se oproep tot liefde en eensgesindheid.

Filippense 2:2 het onder meer tot ons gespreek: “Maak nou my blydskap volkome deur eensgesind te wees: een in liefde, een van hart, een in strewe.”

Ons is verbind tot die eenheid van die kerk. Ons is verbind om met liefde God te verheerlik.

Daryll Guder sê: “Disagreeing Christianly is one of the most powerful forms of incarnational witness the church can practice.” (The Continuous Conversion of the Church). Mag dit ook nou, waar ons intense verskille beleef, die krag van ons getuienis wees!

Namens Moderamen

Ds Nelis Janse van Rensburg
Voorsitter

Die datum vir die volgende gewone vergadering van die Sinode van die NG Kerk in Oos-Kaapland is bepaal vir 31 Oktober tot 3 November 2016. Die vergadering vind by die Willows konferensiesentrum en vakansieoord te Port Elizabeth plaas.

Die NG Kerk het na raadpleging, met die Familie van Kerke en kerke verteenwoordig deur die Tussenkerklike Raad, ooreengekom op ‘n gesamentlike Biddag vir Reën op Sondag 15 November.
Gemeentes word versoek om tydens die erediens geleentheid te gee vir voorbidding.
Groot dele van ons land is vasgevang in ‘n knellende droogte wat mens en dier raak.
Mag die Skeppergod vir ons uitkoms gee!

Die Algemene Sinode het sedert 2002 verskeie verslae oor homoseksualiteit hanteer, asook opeenvolgende besluite daaroor geneem. Kerkrade en gemeentes word in die 2015-besluit aangemoedig om na hierdie verslae en beskrywingspunte te kyk met die oog op hul eie formulering van standpunte en bedieningspraktyk.

Die dokumente kan afgelaai word deur op die volgende skakels te klik:

• 2002: Verslag voor die Algemene Sinode oor Homoseksualiteit
• 2004: Verslag voor die Algemene Sinode oor Homoseksualiteit
• 2002 en 2004: Besluite oor Homoseksualiteit
• 2007: Verslag oor Homoseksualiteit
• 2007: Besluite oor Homoseksualiteit
• 2008: Verslag voor die VGK Algemene Sinode te Hammanskraal
• 2013: Beskrywingspunt oor Homoseksualiteit (Brief 26 lidmate)
• 2013: Besluite deur die Algemene Sinode oor Homoseksualiteit
• 2015: Verslag oor Selfdegeslagverhoudings voor Algemene Sinode
• 2015: Besluite oor Selfdegeslagverhoudings